أبرا كادبرا

كوني بفهم في الأبراج، خلاني بالنسبة للناس عاملة زَي العرافة اللي هتطمنهم على مستقبلهم وهتكشفلهم كل الأسرار المستخبية لأ وكمان هتلاقيلهم حل لكل مشاكلهم العاطفية، ودي كانت دايمًا حاجة بتضايقني، بزعل جدًّا على الناس اللي بتصدق إن ممكن أي مخلوق خلَقُه ربنا يقدر يقولهم حاجة في عِلم الغيب، مايعرفهاش غير ربنا سبحانه وتعالى أو يتوقع إيه اللي ممكن يحصلُّهم في حياتهم وفي مستقبلهم، كنت دايمًا بنصحهم مايسمعوش من حد ولا يصدقوا حد، لكن لأن مش كل الناس بتفهم وبتسمع وبتتقبل الكلام ده، قررت إن اسم الكتاب يكون «أبراكادبرا » لأنه بيعبر جدًّا عن المفهوم المعتقد عند شريحة كبيرة من البشر اللي بيصدقوا في قراية المستقبل، عشان آجي دلوقتى وأقولهم مايصدقوش.